خپلواکي

ستاد سترګو له نظره خوندوره
آزادي له دې هنره خوندوره

پوهه لویه آزادي د ملتونو
فلسفه يې لا ژوره خوندوره

بیداري د ويښ شعور ورلره بویه
له لښکره ترلښکره خوندوره

(ويښ زلمیان) د ويښوچغوپژواکونه
هره چغه يي په نره خوندوره

دا لټون چې د ملي حشر مراد سي
پوهه ورکه ملغلره خوندوره

د(افغان سید) د فکر رڼا خېژي
له کتاب او له منبره خوندوره

د (فلاح) ناره په غږکې د طرزي وي
د هیواد له لراوبره خوندوره

د(پژواک) وطنپالنه په پایښت وي
دغه لار وي منوره خوندوره

(شفیق) شمعې د شعور وي بلي کړي
کړي ځلا له تبحره خوندوره

د (مجروح) انسان پېژند کريکولم وي
د ارواح د درد سندره خوندوره

ددې خاوري قدامت راته ثابت کا
(علامه) وکړي خبره خوندوره

(الفت) مینه د ماناپرمدارحک کا
دا کَښته شي یو په زره خوندوره

د کامي نه د (خادم) آواز اوچت شي
د (رښتین) راستي مثمِره خوندوره

(بېنوا) د غريبانو نوا یوسي
له هلمنده تر ناوره خوندوره

کندهار د بل (رشاد) رشدته چمتو وي
زمونږ ځانګوشي بختوره خوندوره

د ( روهي) رڼاوو برېښ د روه سینګارشي
خوست خوږه کاندي ګورګوره خوندوره

چې غزنی وي (پسرلی) (ماته شپېلۍ) وي
له کندوزه تر مقره خوندوره

د (غبار) تاریخ ته قطع کړو ځنګونونه
هره کرښه مروره خوندوره

چې(کابل) د ژوند ښکلا پر زړونو وېشي
په هرګام له هر منظره خوندوره

(احمدي) مو د ناخوالو کیسه سرکا
ټوله ډکه له خطره خوندوره

د نسلونو د شعور ښکلا ترې غواړم
خپلواکي ده خیالوره خوندوره